2007-8-17 05:39 PM
糖打令:D
轉`至激瘦身 肥貓減肥法
近幾年香港女性被纖體熱潮轟炸，大膽講10個女性應該有9個正在瘦身或有瘦身衝動及打算，到現在瘦身熱將進入另一個境界──同貓狗一齊減肥。當今潮流大勢誓必戒絕用「肥頭得意」形容貓狗，取以代之係「追求曲線」、「玲瓏浮凸」等纖體口號。「體態好嬌少、纖纖的腰多麼嫩滑、身軀嬌俏……」，諗起當年羅文〈波斯貓〉嘅歌詞，似乎會成為今後人、貓一齊瘦身嘅主題歌。
8成貓狗超磅
大家都無意識到貓肥令個問題，因為佢又唔識對食物拒抗，而且貓又成身毛，就算佢肥都有錯覺係啲毛密咗，但貓同人一樣，肥胖亦對健康有極負面影響，肥人嘅後遺症如心臟病、呼吸困難、糖尿病及關節炎，肥貓亦一樣會患上。英國幾年就面對嚴重寵物過肥嘅問題，估計當中有8成貓狗過胖，獸醫喺診治嘅病例中，有二成多係跟肥相關嘅疾病，如心臟病、呼吸困難等。寵物主人為寵物解決肥胖嘅相關問題，每次要花費150至200英磅，為咗愛貓健康及主人荷包着想，香港愛護動物協會今年啱啱正式開設「體重監控療程」幫貓減肥，簡單講就係經獸醫診斷貓狗嘅肥胖程度，透過指定食糧及定時定糧嘅飲食去減磅。不過除咗飲食習慣及居住環境，賀爾蒙失調等病亦係引致寵物肥胖嘅原因，所以想清楚你嘅寵物如果偏肥，都係學大妹去驗一驗身穩陣！
今期主角大妹之介紹
性別係女，令年6歲，本身係本地短毛貓，亦係愛護動物協會嘅第一隻收養貓。由於其可愛外表經常博得訪客餵飼零食，令體重一發不可收拾，令體態只可用肥胖形容！亦正好成為今次纖體之Model。
直擊！真貓驗肥過程
步驟1
嚟到愛協獸醫循例都要磅磅重做紀錄跟進，大妹就高達6kg，比一般街貓標準多2kg，肥到連負責獸醫Dr Fiona抱佢都有一定難度呀！
步驟2
跟住就學前文提及嘅俯視觀察法睇佢胸及腰嘅凹位線條，你睇大妹都冇晒凹線，進一步肯定佢肥胖嘅情況。
步驟3
再摸大妹嘅身體，如果體重標準會感受到肋骨，而大妹嘅情況當然係感受唔到！之後再做一系列身體檢查，嘩，你睇大妹嘅肥肉幾強橫！
貓變胖3部曲
女性纖體追求曲線美，其實貓嘅身裁定斷都係全憑曲線，因為唔同貓種有唔同體重標準，好難以磅重來釐定貓是否過重，所以當你俯視貓隻時，記住觀察胸及腰位置有冇凹線條，標準如下：
唔肥！
係最正常嘅情況，貓隻胸及腰都呈現一定凹位，係體重合適嘅體態，健康健康！
金幾肥？
貓隻胸位置仲有凹位，但腰部凹位已經消失，開始步向肥胖危險。
好肥！
好明顯呢幅圖嘅貓胸腰兩位置都冇晒凹位，係切切實實嘅肥胖。
減肥真實個案：阿Jiu
講咗咁耐減肥對貓嘅益處，係時候搵實例說明。下圖展露巨躉嘅橙色短毛肥貓叫阿Jiu，因為主人有段日子將佢放入貓酒店，經一個月嘅暴食終於搞到體重高達13磅，由於Jiu主人都係抱住肥貓得意嘅心態，所以都不以為然，但一日發現Jiu行路有少少跛嘅情況，直至睇獸醫經一輪抽血、驗血及照x光過程，方發現跛係因為太肥引發糖尿病所致，除要日日打針，更要戒絕所有雜食，改為限時限量食減肥貓糧，最後花咗約半年時間，終於減走10吋腰，減肥後精神及走路情況明顯好轉。
講咗咁耐肥貓，大家都好奇想知得深入啲，上圖黃色物體就係1磅重嘅貓狗脂肪模型，對比放喺左面嘅$1銀仔，Size確係幾得人驚！
愛協獸醫Dr. Fiona醒你幫貓減肥3招：
01食減肥貓糧，提供嘅熱量較一般嘅貓糧為低及纖維豐富，不用刻意減糧，而進度以每月減輕1%為最佳。
02主人可以將每天餵飼分三次及更多次進行，實行小食多餐，避免進行療程嘅寵物太長時間處於肚餓狀態。
03呢個point最重要，每日都同貓一齊做運動，唔係叫你帶貓行街，而係每日抽15分鐘陪佢玩，令貓透過玩樂時嘅郁動增加其運動量，你亦同時做埋運動，fit晒。a
查詢：香港愛護動物協會（灣仔運盛街5號/2802 0501）
未減肥前阿Jiu嘅自拍相，塊面超闊，絕對嚇親街坊！
正常貓（左）及癡肥貓背景比較，真係大咗兩個碼！
阿Jiu纖體後腰圍變回正常短毛貓嘅18吋，好難相信暴肥時腰圍竟達28吋！
自我反省測驗：養肥貓主人之7大特質
好明顯，一隻住家貓肥瘦與否，關鍵取決於肩負餵糧及提供居住環境嘅主人身上。而如果你擁有以下7項其中一項特質，你隻貓想唔肥都難，當然擁有以下特質愈多，你隻貓就愈肥。
「多啦A夢」中毒：如果你細個就鍾意多啦A夢，接受貓應該係「肥頭」先得意，你潛意識有意無意都會谷肥隻貓，佢唔肥都難！
衰心軟：雖然明知貓仔已經食夠，但一聽見隻貓「喵」多幾聲，你就驚死佢唔飽，再度為佢添糧，唔肥就假。
養貓數量：如果你只養1隻貓，佢喺無玩伴嘅情況下活動有限，即偏向易肥！相反養2隻或以上嘅貓，彼此可以互相追逐，運動量較高可避免易胖。
貓兜常滿：為咗方便或者驚唔記得添糧，多數主人會一得閒就幫貓兜添糧，令兜經常處於常滿狀態，隻貓日食夜食，唔肥都難喇！
分甘同味：除咗餵貓糧，自己食飯食剩𣆥，唔想浪費又唔想食隔夜𣆥，多數主人都會將湯渣分俾貓食，換句話講即係食多一餐喇！
陪玩：要知道香港地方細，貓都係無乜地方舒展筋骨，如果養貓嘅你都冇乜同貓玩，運動量偏低都係易肥！
年紀老邁：貓同人一樣，年紀愈大活動力減少需要嘅熱量就愈細，換句話就要按年齡減貓糧，忽略此點都會令隻貓易肥！